Բանջարեղենը` եփա՞ծ, թե՞ տապակած. news.am

Ոմանք պնդում են, թե բանջարեղենն անհրաժեշտ է ուտել միայն հում վիճակում, մյուսներն ասում են, որ դրանք կարելի է եփել: Այժմ իսպանացի գիտնականները պնդում են, որ բանջարեղենը ձիթապտղի յուղով տապակելն անհամեմատ ավելի օգտակար է, քան` եփելը: 

Գիտնականների խոսքով, ձիթապտղի յուղով տապակելը բանջարեղենում ավելացնում է հակաօքսիդանտների խտությունը, որոնք օգնում են կանխարգելել քաղցկեղային հիվանդությունները, դիաբետը եւ շատ այլ հիվանդություններ: 

«Ի տարբերություն եփելուն, բանջարեղենը տապակելուց ավելանում է ֆենոլային միացությունների թիվը: Ճարպը, որպես ջերմության փոխանցման միջոց, մեծացնում է բանջարեղենում ֆենոլային միացությունների թիվը, ի տարբերություն, օրինակ, եփելիս, որի դեպքում ջերմությունը բանջարեղենին փոխանցվում է ջրի միջոցով», - նշել է Քրիստինա Սամանիեգո Սանչեսը Գրանադայի համալսարանից: 

Պարզելու համար, թե պատրաստման տարբեր մեթոդներն ինչպես են ազդում բանջարեղենում հակաօքսիդանտների թվի վրա, գիտնականները հետազոտության շրջանակում փորձել են տապակել, եփել ե՛ւ ձիթայուղի ե՛ւ ջրի խառնուրդում պատրաստել կարտոֆիլ, դդում, լոլիկ ու սմբուկ: Հետո ստուգել են բոլոր ուտեստներում ճարպի, հեղուկի եւ հակաօքսիդանտների քանակությունը: 

Պարզվել է, որ բանջարեղենը ձիթապտղի յուղում տապակելիս դրանում ավելանում է ճարպերի քանակությունը (հետեւաբար` կալորիաները) եւ նվազում է հեղուկի քանակությունը: Սակայն տապակած բանջարեղենում հակաօքսիդանտների քանակությունը նույնպես ավելանում է:

Այդ հետազոտության մասին գրում է Food Chemistry ամսագիրը:

Հարցեր, պատասխաններ, մեկնաբանություններ